Prishtina – Ferizaji 2:1

Prishtina mposhti Ferizajin, 2:1, për të vazhduar serinë e rezultateve pozitive.

Prishtinë, 28 tetor – Në kuadër të xhiros së 15-të të Superligës së Kosovës në futboll, FC Prishtina mposhti Ferizajin, me rezultat 2:1.

Pas një ore lojë vendasit kaluan në epërsi, pasi Genc Sermaxhaj goditi nga një distancë prej 25 metra ndërsa topin e devijoi futbollisti ferizajas Shpend Gashi, duke shënuar autogol.

Tetë minuta më vonë lojë, sërish Sermaxhaj harkoi një top të mirë, të cilin Alievski me kokë e dërgoi në portën e mysafirëve, për epërsinë 2:0 të Prishtinës.

E tëra që arritën të bëjnë futbollistët e Ferizajit, ishte goli nga penalltia, të cilin e realizoi Lubishtani, kur kishte mbetur edhe një minutë deri në fund të takimit.

Sipas trajnerit të Prishtinës, Skender Shengyli, futbollistët e tij ishin më superiorë se kundërshtarët e tyre sidomos në pjesën e parë, por rastet e krijuara nuk arritën t’i konkretizojnë. Megjithatë ai është shprehur i lumtur me fitoren.

“Në pjesën e dytë arritëm të shënojmë dy gola edhe pse patëm një mori raste. Ndërsa penalltia në minutën e fundit ishte e panevojshme, pasi mbrojtësi ynë bëri një ndërhyrje të pafalshme, duke tërhequr për fanellën pa nevojë futbollistin rival. Ky gol na e prishi edhe serinë e mos pësimit të golave në pesë ndeshjet e fundit”, tha pas ndeshjes Shengyli.

Pas 15 xhirove, Prishtina zë vendin e shtatë në Superligë, me gjithsej 21 pikë.

Në xhiron e 16-të, Prishtina do të jetë mysafire e KEK-ut.